豆子農場

我終於睇左謝安琪演唱會啦！

2012-01-18T21:17:00.000+08:00

自從《囍帖街》令謝安琪爆紅，極速上位之後，一直都有好多針對她的報道。

雜誌炒作她與陳奕迅，還有淫照作證、

繼而攻擊其演唱水準，頻頻走音、

然後又有報道指她曾經整容……

面對種種不實的報道，她選擇用自己的音樂去回應。

這次的演唱會，

沒有數十個伴舞，也沒有任何煙火特技，

純粹就是以「歌」來向觀眾表達她的訊息。

當然這大可以被說成「製作費不足，被迫單人匹馬上陣，Dancer都無錢請」

但真正喜歡她的音樂的人，

會明白，伴舞的存在並不重要，只要有音樂，有歌聲就足夠。

精心挑選的Live Band，水準絕對於大部分香港演唱會之上。

單單是黃丹儀的鋼琴便令歌者更投入於演繹當中。

當她唱著她的拿手之作，草根之歌之時，那種震撼並非一字一句可以形容。

《鍾無艷》這類迎合大眾的k歌，聽起來沒什麼感覺。

反而她唱《活著》、《潔淨皇后》，真的能叫人感動。

這種反映社會現象的歌，只有謝安琪才能唱得動聽，

換轉是容祖兒對你唱《十二月二十》，我除了會起雞皮就沒有其他的感覺了。

一個人唱足三個小時，沒有走音、沒有甩拍，

證明了謝安琪的現場演唱水準已非當年，各位又何必不斷攻擊她走音？

第二天（快樂是…）

都是期待聽，然後她有唱的。

假如2012真的有末日，那麼，她是末日中慰藉心靈的明燈。

就過年，好忙啊！

2012-01-17T23:42:00.002+08:00

哎，我都唔明，今年又唔會去拜年，
但時間就好似永遠都唔夠用咁。

過去兩個禮拜好似發生左好多事咁，
隻牛生日啦、我轉左floor啦、發現自己無人工加啦（！）
好似太多野密集式咁湧黎，無乜反應咁。

其實我好想寫海洋公園新果堆機動遊戲，
但隻牛hold起d相唔比我，我都無計。
太多野寫啦其實，遲下先算啦，訓啦。

邊個咁大整古呀？

2012-01-09T01:48:00.001+08:00

今日一番到屋企就見到呢張野放係macbook pro前面。

第一時間係度諗，到底係咩野黎架？
我完全無印象係拍賣買過野啵，就算係，都無可能咁快到。
呢一張通知卡諗左我成晚，我都未諗到係咩野、邊個寄。
哎真係好難諗。

頭先係facebook見到張圖笑左我好耐。

你地又會係邊種？哈

Moo日快樂

2012-01-04T23:17:00.003+08:00

話說，二零一二年一月四日，

有一頭叫做Moomoo的牛又大一歲了！

祝moomoo越來越Chok，yay！

請大家盡情留言給這隻牛吧。

這隻牛今年收到了很多禮物呢！

有美味的牛糧一大袋、

牛牛造型的磁石、

一Set兩件的牛牛茶杯、

最後的大禮，

有iPad2 （！）

貓米基金馬上瓦解了。

新年快樂

2012-01-01T17:56:00.001+08:00

新的一年
祝大家心想事成，乜都順順利利

2012的第一日我決定染左個頭佢。
染番黑色先！

頂，點解呢枝泡泡染髮整完咁似冷帽。

好凍呀…聖誕快樂

2011-12-25T17:56:00.001+08:00

在此祝各位聖誕快樂。
今日天氣咁凍真係襯番哂，希望大家聽日開開心心拆禮物啦哈！

Have yourself a merry little Christmas!

X100實拍－兩隻貓的美圖

2011-12-21T12:25:00.002+08:00

好耐沒有幫佢地拍過美照。

冬菇都係走來走去，唔肯坐定定。
烏糟就乖好多了，學下人啦你！
X100影macro真係一流，有少少奶味。

一年兩次迪士尼－反斗奇兵大本營

2011-12-20T22:03:00.003+08:00

今年已經係第二次入園玩了，真的要多謝babe的免費飛！

Toy Story Land十二月初先開，已經見到好多同事Share相，睇到都心動啦。

今次決定做隻Early Bird，一大早十點幾就入園玩。

果然同上次的人流差很遠，就連玩最Hit的RC Racer，都只等了五分鐘。好多人話佢似海洋公園的海盜船，實際上呢個勁好多啦。前前後後其實盪左六七野左右，但第二下已經黎料，坐最後可以感受以高速被扯向後再向前速的離心力，上到最高點時直情叫唔到，實在太驚啦。話說最高點唔只九十度，自己去玩啦下。

之後玩了比較合家歡的《轉轉彈弓狗》，可能太得意所以好多人排隊，等左20分鐘左右。本身以為佢只係轉轉下無乜特別，點知原來離心力好勁，成個人都揈左去另一邊。不過係幾過癮既，彈弓狗都好可愛呀。之後我買左彈弓狗的頸巾，五五折咋！玩埋最後一個跳降傘就係咁多了。反而呢個排得最耐，差唔多半粒鐘都有。同埋都真係幾驚下，哈。

話說一到夜晚，小鎮大街就會落雪，實際上只不過係泡泡而已，但係如果唔記得戴帽真係會成頭都白雪雪幾核突下架。煙花就十年如一日都係果一個rundown啦，都係一路爆一路嘩嘩嘩，嘩到咁上下就高潮位爆到開巷咁樣啦。如果無免費飛黎玩又真係幾唔抵……

蜂王漿之威力

2011-12-20T22:01:00.002+08:00

呢個冬天氣溫同濕度實在太飄忽，時凍時暖，一日可以差十幾度。咁既氣候保唔夠水皮膚真係會猛猛緊。今期有兩件極力推介既護膚品，都係同蜂王漿有關。

AQUALABEL Royal Rich Essence，這枝精華素雖然搽上手好水既感覺，但係保濕力很強，都很快會吸收。就算訓醒塊臉都係咁水潤唔lup。

講到重點修護就緊係唔少得平通街的「我的美麗日記」啦。全系列一盒十片$5x，除開每塊都係五個幾，新出既蜂王漿面膜又真係幾正。其實我成日推介產品又無得收稿費係咪好蝕，哈。

重新出發 - 《你們的幸福》

2011-12-17T08:19:00.003+08:00

經過上年《第二個家》攻台失利之後，謝安琪在本地樂壇似乎沉寂多時。當大家正在推敲何時才有新歌之際，原來新碟的第一Plug 《十二月二十》已經俏俏在五月派台。第二Plug 《你們的幸福》派台不久，這隻專輯亦相應推出。

也許是首張國語專輯與本身歌路相差甚遠的原故，《你們的幸福》的主題回歸謝安琪的強項：社會時事。始終她也是唱這類歌而「起家」，新碟走此路線也不出為奇。但在題材的處理、歌曲風格之上，《你們的幸福》比過往幾隻大碟更見突破。例如《潔淨皇后》以清潔工人為題，

決意帶四歲幼女與異地伴侶聚頭
一出邊境學歷練歷遭打折扣
操鄉音會被視做外星的怪獸

有過夢向上游奮發做單車手
怎知與他邂逅跨境變身潔淨皇后
斷氣為了薄酬更變賣了自由
心中那小宇宙不可發揮跌入泥石流

描寫了新移民來港自力更生卻得不到認同，被港人標籤為「大陸喱」、「搶資源」。其實香港人歧視的不只新移民，還有這些基層的工人。副歌的歌詞更是一絕。而在《叱吒樂壇》的訪問時，謝安琪指出不少「潔淨皇后」在國內原是擁有高學歷，甚至乎是單車手。但為了與丈夫團聚，不得放下理想來港。同碟另一首Side track 《浮雲》也有同樣的風格，只不過在描述新移民同時，其實也是對貧富懸殊的控訴。

於國金　她更覺得窮困
怕看見櫥窗銷售品
仰望　別人孩子著名牌子
對孩兒苦笑　要簡單一點的做人

她決心　堅拒世間憐憫
盡了力　天梯上不了始終安於責任
信奉勤奮　帶來平穩
仍然樂觀相信世人平等

當然少不了最拿手的電音作品，分別有《借過》和《溫室》。前者是一首寫給特區正苦的歌，諷刺官員無能；而後者則寫出時下港孩的「幸福」，也少不了那些病態的家長們。但其實我最喜愛的是這一首：

2007年的《第一天》，是送給還在媽媽肚內的兒子。

事隔四年，《第二天（快樂是…）》是送給漸漸長大的孩子。

會肚餓但未懂得怎講
深宵裡會暗得不見我
會有病額上滿是熱汗
奔跑會跌痛哭濕眼角

會有功課習作似負荷
給班裡百厭生欺壓過
有老師責罵與罰留堂
運動會輸了心火會燙

但別太過洩氣驚慌
(長路裡總有升降)
夜幕再暗也有星光
(浮在天空有張網)
越是漆黑　越覺得星宿清朗
患難教你　更覺得快樂難忘

動手自己做 - 茄汁芝士腸焗扁意粉

2011-12-05T19:46:00.004+08:00

其實我從來都唔識煮複雜既野。

公仔麵最多都係加d菜呀丸呀落去煮，再複雜少少多數會出事。

好似呢幾年煎餃子唔知點解都失敗，我研究左好耐都唔知點解，算啦。

今日要介紹點樣整呢個意粉。

其實可以用其他麵做麵底都得，用公仔面都唔錯。

意粉放水，加鹽煮到八成熟左右，撈起乾水。

芝士腸都落水灼一灼，半熟就ok。

係盤底塗上一層薄油，將意粉倒落去，用意粉茄醬撈勻，然後放上芝士腸，

再搽一層茄醬，放埋芝士就入得焗爐啦。

用250度焗八分鐘食得！

RED Mr 之唱通宵平到笑

2011-11-29T16:11:00.002+08:00

話說已經係第二次幫襯RED Mr.

係咪無生意定點樣，最近佢地有個promotion，星期日至四凌晨十二點過後，每位最低消費只係$50。無錯，任你叫乜野都得，位位最低$50就可以埋單。

我以為佢寫杯野飲都成舊水，其實不然，三十零蚊就有，飲酒都係五十左右，我同兩位同事由一點唱到六點，聲都沙埋最後埋單先係229。唔唱就走寶。不過英皇東亞金牌既歌就真係幾少下既，容祖兒黎黎去去都係得三版，要唱《搜神記》就唔該過主去Neway啦。

講開Neway，上星期六晚去唱，$250唱得兩粒鐘，真係比人禁住黎搶。哎。

三日連環大掃貨

2011-11-15T00:30:00.002+08:00

其實都唔係太記得確實買過咩…

SOGO 日版出前一丁五包裝 x 3

義美蛋糕 x 5

北海道牛乳 1L 裝

巨峰提子

蜜柑

Hi-Chew 軟糖 x 6

日本即食碗麵

合味道日本版加大咖喱杯麵

日本版可樂

零食……

H&M 孖襟褸

仿皮褸

Simpsons 襪 x 2

Jusco 農心碗麵 x 2

蘆薈蜜

即食炸醬麵 x 2

大包裝蝦條

無印有餡棉花糖

香薰座

迷你豆沙包 x 3

袋裝糖 x 3

IKEA 衣架一包

毛巾拖鞋

洗衣袋

香味小蠟燭 x 2

燭台

爆谷一盒

UNIQLO 恤衫

牛角Tee

尚有其他不能盡錄………

奇怪夢

2011-11-14T13:15:00.002+08:00

最近發既夢越來越奇怪……

話說屋企人忽然話搬屋啦，咁好啦，每一晚都執野。

點解執極都好似執唔哂咁既…

點解又會番左學校同老師同學Say Goodbye既…

然後仲要喊哂咁款…

之後番到屋企繼續執野啦，執執下先知，原來搬過隔離邨果幢居屋。

咩話？一百呎一千萬？原來係搬過去齋訓？咁點解要執咁多野呢…

風水屋喎原來，好啦去睇下樓。

明明間屋係天水圍，但搭左車去朗屏再行番轉頭…

去到個商場，入面燈都無一盞，黑媽媽又成場都係食蕉

於是就同家姐成場走黎走去…

咩夢黎架哎。

原來成個月都無update過

2011-11-01T19:49:00.003+08:00

要改變一下現在的生活。休養生息寫番野，

其實我連書都未溫，未有任何準備。哈哈。

期待番少D工的日子，時間多了可以做下運動。

林憶蓮演唱會 MMXI - 最終回 (1)

2011-09-27T00:30:00.007+08:00

八點四十五分，等了幾個月，終於等到這一幕的開始。

整場演唱會，無論是蓮母的歌藝，或者是選曲方面其實我都相當滿足。但唯獨是今次的音響簡直叫人聽不下去。一開場以《枯榮》打頭陣，唱功當然在水準之上，然而戴著headset的蓮母邊唱邊跳，整段verse都不大聽清楚歌詞的每隻字。第一次Chorus完結後她也以手蓋住咪頭，似乎她也知道這個問題吧。

之後的Dance Medley可能來得太快，大家還未Ready，現場的氣氛（580除外）尚算冷靜，可能這段的歌比較冷門吧，埃及玫瑰1000打都也不是人人都識。但之後的《心碎巷》和《愛的廢墟》Rock版，因為音響實在太差，幾把電結他的聲混在一起，完全聽不到歌聲。哎，居然還說Sound Engineer是由日本而來，試問又怎會和上次Live 07'的效果相差這麼遠呢？我還記得，在Star Hall看演唱會時，整套音響系統的聲音，簡直Tune得和CD無分別，層次分明又清脆。有朋友反映$180位反而無事，那到底是否技術上的失誤？

兩首舊歌過後，憶蓮唱了《月球人》。其實這首歌我沒有認真聽過三兩次，但還算入耳，當然要加上憶蓮的唱功才有如此完美的表現啦。接著恭碩良出場，與憶蓮合唱《下雨天》，全場氣氛馬上被推高，似乎這些選擇才為人熟悉。小改板的《下雨天》，Bassline的旋律變得更哀怨，節奏亦變得Chok下Chok下。看著憶蓮在音樂中翩翩起舞，心裡實在暗喜。恭碩良甫開口，全場起哄。無辦法，原唱者某程度實在太平庸了。

我最想聽的…憶蓮

2011-09-22T21:55:00.003+08:00

仲有三日就係睇憶蓮MMXI演唱會的大日子了！

心情萬分興奮，無論係開Concert定係出新碟都等到我地頸都長。

上一次Live 07'走偏鋒路線，我非常受落。

不過今次係紅館開，未必會似上次咁有太多新元素。

但，不緊要，有得睇已經開心。況且憶蓮都唔會交行貨啦。

開演在即，係時候放上四首最想聽Live既歌，等Moomoo都可以溫習下嘛。

我好擔心佢去到會話悶添。

夜了…沒有藉口（City Rhythm Part I/1988）

很動聽的一首Side Track，無須多講。

傾斜（Faces & Places/1990）

好遺憾07年唔係睇尾場，無Encore，今次尾場請比心機唱吧蓮母，我會狂呼。

一輩子心情（野花/1991）

聽落感覺相當溫馨的一首Side Track，無論係Verse既溫柔，定係Chorus既澎拜都無懈可撃。

至少還有你（林憶蓮's/2000）

你話我老土又好，悶都好，至少還有你真係經典，更加係我同Moomoo的Love song，

到時拖住手去聽會有咩感覺呢？

好期待呀！

iBeauty 美容保濕噴霧機

2011-09-22T19:09:00.003+08:00

雖然睇落好似電話，但實際上可是一樣好好用的工具。

佢可將化妝水轉化成細小的水分子細霧，

輕輕噴在面上好快就吸收了。

團購價只要$88，當買玩具都算抵。

何況真的好有用呢，仲可以帶出街。

唯一的缺點就是Water Tank實在太細了，用五、六次就要refill。

希望下一代有改善啦。

Fujifilm X100

2011-09-19T02:37:00.003+08:00

如果GF1係相機界既女朋友的話，咁X100就真係男神了。

哎，原本都諗住只係問下價，打算十一月睇埋NEX-7既review先至決定買邊部。

點知當moomoo聽到恆生卡都做到廿四個月免息分期的時候，

佢就突然之間好想今天買相機。

喔呵呵，原來佢係打貓米張Muji Card的主意。

最後係百老匯買了，11360連Hood加皮套，度度都係咁上下價。

不過百老匯始終感覺上老實過兇宅，明明同一樣野兇宅貴左成千蚊有突。

其實星期六先買了空氣清新機打算送給Moomoo，點知張卡唔到兩日就爆鳥。

不過佢既然鐘意，碌爆卡做分期又點話。

同埋，我好快又有第二張啦，哈哈哈。

又係ASTALIFT

2011-09-10T17:06:00.004+08:00

實在太好用太好用太好用了。

由第一枝ASTALIFT化妝水之後，陸陸續續買了洗面膏、Emulsion，還有超人氣保濕Jelly。

足足用了九個月，皮膚可是有明顯的改善喔。

就算唔夠訓的日子，睇落都總是容光煥發。

化妝水快用完了，馬上補入美白化妝水。

試過同系列的美白精華，搽在手背上，幾小時就明顯見到效果。

Moomoo還問：你隻右手做乜事白左咁多既？

睇黎真的很有功效，無介紹錯。

遲下Astalift門市有Facial可做（！），還會有面膜（百幾蚊塊好X貴！！）

仲出埋粉底（！！！），真係問你死未。黎緊份糧玩猿鳥。

新廣告仲要有聖子姨姨同今日子（！！！！！！！！！！！）

Repeat.

2011-09-01T18:49:00.002+08:00

三個月來的生活，其實都搞唔清楚自己到底做緊乜。

今日見Floor唔忙，問左仙姐的Approval後便決定早走。

今朝搭西鐵上班時，看見很多穿著光鮮校服的學生。

無論是期待開學的中一雞、或是染了一個柒頭生怕被訓導捉的同學、

又或者為DSE感到徬徨的中六生，雖然有著各自的期盼、恐懼，

但能夠在學校開開心心過日子，這真的是一生難求呢。

望著他們再想想自己，七年前我還是一個Form 1 雞，現在七年過去，

中學生的身分都是時候要放下了。

不想長大，卻總要面對成人的挑戰。

我總是覺得我們這一屆的人，讀書又得、又玩得，面面俱圓。

本班的柒頭們便是很好的例子啦係咪先？

我真的很懷念，

一同在班房食玉姐炒米粉、睇報紙、玩投影機影西健、空堂玩電腦、單打麻包袋、陸運會留到十點然後一齊食咖喱至尊、一切的癲癲喪喪。多謝你們帶給我一份寶貴的回憶。

我們這一屆的所有回憶，真的要好好保存，

我不想以後生活到頹廢時找不回這些記憶。

冷暖那可休，回頭多少個秋。

忽冷忽熱

2011-08-13T12:54:00.002+08:00

本書其實已經睇左一半有多，剩低一半，仲想慢慢咁磨落去。

因為實在太精彩。

遊記如果寫得好，真係會有種「親歷其境」既感覺。

睇g寫佢去萄葡牙、去德國既小農莊，體驗一啲都市人從來都無乜機會體驗既野。

好想放下假，乜都唔理就咁離開香港一排。

反正今年時間鬆動得多，得閒整個大假說實的，不難。

如果可以的話，攜同Moomoo一同遠走高飛一陣子都唔錯架。

睇下佢有冇假放啦。

因為，

而家我地係同事了，喔呵呵。

出路

2011-08-02T01:52:00.002+08:00

或者今天選擇要走的路有點遙遠。

但我知道，大家最終，也會走在一起。

既然已經決定了，就不要後悔。

明年，在大學校園，我們再相遇。

失敗了

2011-07-29T12:37:00.001+08:00

Appeal的結果仍然維持原判。

Offer? 我呸！

2011-07-28T00:52:00.001+08:00

假如，我要左個offer的話，

我堅信我將會係AAMET當中成績第一的一位。

兩條A入Asso？仲唔威威到盡 LOL

所以我完全唔擔心有咩offer，反正Main round我都唔會要。

我想知Appeal出黎咩成績咋哈。

學會 Thanks giving

2011-07-27T01:50:00.002+08:00

讀書、番工做野，乜都話辛苦的香港人，總是學不會「感恩」。

Thanks giving （我自己睇法）不存在任何宗教意義，和滿天神佛無半點關係。

關鍵是閣下的內心。

昨天十一點上班，慘遇Cut 鐘，最後兩點半打卡走人。說實的開頭有點不爽，不如叫我唔好番仲好啦。但早收工，朋友難得一叫就出，趕得及逛書展，這些都是我認為那天值得我去Thanks giving的事情。做人其實就不過如此簡單嘛。小小事都可以很快樂，不需要花錢花精神去故意令自己開心的。

每天睡覺之前想想有什麼事情，值得再一回想、感謝。

今天可以在Floor留守到最後一刻，又能舒舒服服搭西鐵，吃到串燒佬的燒粟米，真的覺得很滿足，這些事真的要好好感恩。

還有，一直都有收看這個Blog的朋友們，無論我見到或見不到你們，我也覺得很感恩。原來我寫的東西真的有人看呀！

忙過一輪之後，其實自己到底在做什麼？

2011-07-23T22:09:00.002+08:00

同事說我和兩年前一樣，一放暑假就發狂地上班。

可能是太操勞，這一星期身體也不斷出狀況。

其實相對地這禮拜的工作時間已縮短了，但每朝睡醒仍是很疲倦。

應該說是睡得很差比較合適。

一睡著便開始發夢，發呀發，醒前的一刻仍在夢境中。

有人問我是不是有壓力，但老實說沒有。

Appeal成功與否沒怎想過，因為已經通通都作好打算啦。

好幾天一晚幾個夢了，真的會很累。這個問題，有無良方解決呢？

長久下去我睡了就等於沒睡。

還有，腦袋會間歇性地hang機。有頭暈暈的情況出現。

我還以為是沒有吃飯，所以沒精神。

原來不是喔。

但不工作我就沒事可幹了。哎呀。

太忙

2011-07-11T23:56:00.002+08:00

忙番工。一個星期四十八個鐘，工時簡直又越過高山又越過谷。

忙訓覺。收工搭車由尖東訓到天水圍，迷迷糊糊番屋企又再訓。

但都仲係訓唔夠，黑眼圈就快大過國寶。

忙Grad Din，呢樣真係講黎都蹝氣。

算啦都係繼續番工，快X啲過左呢兩三個星期，出糧吧。

榜已放

2011-06-30T15:11:00.000+08:00

即係咁，見到張成績表，都唔知道好嬲定好笑。

一共考四科，兩科A一科C，居然最後企概唔合格。

真係又開心又失望，今次我唔appeal我唔姓林，真係無可能咁低分呢。

不過快D讚我勁啦，話哂有兩條A。

其實我真係發夢都冇諗過自己可以做到小狀元。

從來都覺得A呢回事同我冇關係。就算中史好比心機咁答，都只係預自己拎credit 或 B。

中化更加係我一向既弱項，所以有兩個A我真係好驚訝。

反而幾有信心既BS就搞成咁。哎。

希望appeal成功可以上degree。

新玩具 - 耳機改模完成

2011-06-26T01:10:00.004+08:00

這對耳機是由一直在使用的 Super.fi 5 Pro改裝而成的。

有見已經使用了兩年，要延長它的生命，改模也是一個不錯的選擇。

然後，在別人店舖不小心扯壞了自己的耳機，變相被迫改模 =..=。

等了一個半月它終於來到我的手上了！

還有新的耳機線，謝謝moomoo先替貓米付賬:$

現在每一次使用就有那種「與世隔絕」的感覺。

因為耳模是根據貓耳度「耳」訂造，所以與耳朵可以緊密結合在一起。

看看誰也有這些耳機？

我知道大叔至憎謝安琪所以我專登揀佢 LOL

到底係上面整artwork好，定係閃石（just like 右上角）好？

又是電影 - 潮性辦公室

2011-06-16T01:30:00.003+08:00

我不是死了，只是前排番工呢排放很多假吧。

今晚在The One看了潮性辦公室。第一次在這兒看電影呢。

坐位方面很滿意，裝修也比一般的百老匯豪華。但唯獨是上去的電梯太少了。

Rush hour的時候要等一會才到達。

兩位舞台劇演員擔大旗演出，有大量的笑位，但當中有些是似層相識。

之前看過舞台劇版的，有幾個情節也在電影中找到。

不是說不好笑，只是有些東西看過了一次，之後再看，就未必有相同的感覺了。

但如果想開心的話，一看無妨。

呢段真係笑到我喊。

X-Men First Class

2011-06-04T14:39:00.002+08:00

咩呀？X Men 頭等艙啊？

其實一直都對呢一類戲無太大興趣。

但琴晚誤打誤撞（加上有隻moomoo扭計要我陪佢睇）之下睇完，又覺得幾好啵。

個故事大概都係邪不能勝正呀，正既聯手對抗壞人之類。

大家都有超能力又打得好好睇咁啊咁囉。但係唔可以否認的係打鬥場面係ok精彩的。

入面有個女主角個樣，真係好似Glee果個Santana，我開頭仲諗佢做咩白左。

原來係兩個人黎既。

我覺得大家真係要多D去圓方睇戲。學生飛價都係五十，位又舒服仲識震。

抵到爛啦真係。

三日假期很無聊

2011-05-30T01:30:00.003+08:00

連續番左差唔多成個月。

黎到而家終於有得休息，有連續三日既假，好罕有架頂。

人就係咁矛盾啦。

無得番果陣期望佢比多D更你。

當佢比好多，半更，番六個鐘就叫你拜拜既，你又會覺得唔想番。

最後都係番左。射波條數唔襟計呀。

忙完一輪有假放，個人靜落黎先發覺之前都唔知自己做緊乜。

唔想咁快比社會同化，哎。

但係呢三日做乜野好我又無頭緒。

留係屋企（實係啦都未出糧，想去街都冇我份）無所事事咁過三日又覺得虛耗光陰。

有無唔使點用錢，一個人可以做，又有益身心既事呢？

做運動聽日會去。但，仲有冇其他？

再係咁坐係屋企真係會生菇架啦。

貓文治

2011-05-25T22:27:00.004+08:00

貓文治，是「貓米整的三文治」的簡稱，乃填飽牛肚子的主要食糧。

貓文治的材料和制作過程十分簡單，其實可能連冬菇都識整。

（冬菇：關我咩事，我負責食架咋啵。喵~）

制作貓文治，我們需要的有：

午餐肉一罐。三花是首選，長城還可。

切勿貪平買福字午餐肉，已中伏。煎完散到冇朋友。

雞蛋就六隻，糖呢就兩茶匙，仲有橙皮添。

其實不用糖和橙皮啦，但六隻整兩份是差不多的。

切了包皮的方包六塊。嘉頓吧，都冇其他牌子可以揀。

當然少不了貓米的愛心一噸。

製法：

午餐肉切成圓片，請切成八片。六隻蛋分兩次打，每次三隻，加點油。

麵包取出待用。

先煎午餐肉，然後再煎蛋。為做到滑蛋口感請預備多一點油。

之後的Layer要怎樣排呢？要視乎moomoo的喜好。

多數我也會在一份內夾四塊餐肉，務求滿足moomoo大食的胃口。

貓文治乃限量供應產品，只供moomoo享用。

每次須預先致電農場下單。

相片後補。

數據分析及統計

2011-05-25T22:13:00.003+08:00

農場由零八年十月一日開業至今，Pageview原來都仲係得萬七……

咦唔係啵，個數係由零九年五月計起。

每個月既流量keep住都有兩千左右，但我懷疑當中有一千係自己click既，

五百係moomoo為左update農場最新動態而click，淨低果五百先真正係Viewer LOL

好啦，Referred URL最多既居然係……

大叔囉……仲要有成千次，其實係咪大叔你自己禁架咋？

你肯定一早知我會寫呢篇啦哈哈哈。

第二位係Forum 既 link，數字都叫合理。

我唔明點解係yahoo search恭喜發財都可以搵到我個Blog囉咩事。

農場的Viewer來自世界各地，遠至馬拉都有捧場客。

真係多謝多謝，希望各位繼續支持。

Goodbye!

2011-05-22T19:39:00.003+08:00

一生人當中，每一天講過多少次再見？

七甲班的同學們，我們何時又再見？

畢業禮過得很快樂，辛苦你們又要忍受聽我唱歌。

雖然之後要大家在活動中心迫來迫去影相，感覺不太好受。

但那一種在學校生活的感覺又再一次重臨了。

之後居然同大佬文仔攣文ii信B一行六人，去做了些無聊事。

走去影貼紙相，還要是增長睫毛變大眼那種。

只能夠說一句：So Gay！

一世人唔做番次咁既事，真係會有遺憾。

我地仲一齊破左大佬既處，帶佢影第一次貼紙相。

點知就搞成咁，你真係一生難忘啦今次。

之後食韓燒食埋糖水，肚又飽，心又滿足。

好耐無試過咁開心，一班同學可以傾得咁投入。

一日同學，一世都係同學呀！

畢左業都唔好唔見人影啦知無！

生日後記 - Moomoo的話

2011-05-18T03:12:00.007+08:00

據說在今年四月二十七日晚上,

除了是moomoo跟貓米慶祝的第二個生日,
更是許下真心承諾的一週年,
作為盡心的moomoo又怎會沒有準備呢

可是那天居然吵大架了,

一方面moomoo一如既往沉默地面對生氣的貓米,
另一方面心底裡就是無言的委屈

其實一早準備好的,十九封的信,他很想要的7506,
可是某天當貓米到牛家用電腦
比他發現了7506的ebay搜尋記錄,
唉也,驚喜被人揭穿了,很討厭

然後埋頭苦計一論數字後

決定了買他更想要的condenser mic (shure beta series)

反正貴不了7506多小

小插曲來了

話說買mic當天,因為跟貓米有約

但出了點意外

到了約會時間時,還在付錢

打來電話亦無暇應接

結果當然又是捱鬧了 ="=

麻煩來了,買後兩日發現,

原來mic有分wireless跟wired,

天真的我以為大家都是share mic頭的 =.=

那天晚上心裡一路忐忑很多問題:

唉也,唔知可唔可以加錢換番

唔知趕唔趕得切

失落了兩天後衝到舖

舖頭說這些高階貨沒有存貨

要打比代理拎貨,但正值復活節假

又要滿懷心事的等等等...

等到完假了,又連續三天特意去鴨記舖頭問

(因為經常敷衍我,又冇打番黎話我知結果,連續幾日落去搞到我都唔好意思)

(另外果間專賣shure既雅歌仲仆__,連報價都報到冇尾飛陀,落舖搵佢又話負責同事咁岩出左去!)

然後結局有目共睹 - 就是趕不了

而且很失預算 - 無線版本接受貴三倍=.=!!!!

不過既然付了錢,又不能退錢

唯有硬著頭皮照買吧,反正只要節制一點還是購買能力範圍

為了先前計畫好的驚喜計劃,

我決定全部禮物都因為支mic而押後送出!

(可能因為唔想糟塌自己既心機-.-)

暗地裡準備了一張卡以表心意,好讓也不至於沒有禮物吧

那天一開始時大家已經鬧得很差,

後期雖然好轉,

但一聽到我沒有準備禮物時,

貓米失望了,很不開心

其實我是體諒的,因為我自己都因此不開心

還好那張心意你也接受

最後跟你點起了雪芳蛋糕的蠟燭,

望著你許下一個我不知道的願望,

然後在寂靜無人的足球場中心一面談起心底話,

一面投訴為何蚊子早出現了那麼多

走過昔日跟你許下承諾的地方

依舊的親下去,

緊張不見了,一年來的練習成果呢,嘿

踏上手牽手走過的路,

兩面的草比上年更長了;

還有兩隻手牽的更緊了

故事仲有後續!!

好啦,千等萬等終於等到套野到左啦

即刻去比錢,果日本來約左隻貓

以為買完,放埋番屋企,番學校印埋野

時間岩岩好

點知,比錢果陣,舊式電視情節發生係我身上...

"先生/小姐,唔好意思啊,你張卡碌唔到啊"

打去card centre問完來係我有好多分期食住左個信用額..

朝早做個ebanking交卡數又未轉到住喎

唔緊要,eps!
點知戶口二差幾百

戶口一因為ebanking交卡數條數hold住左,

連續三次fail!

於是心諗:頂,我禁cash出黎!

一出去大街想去禁錢,無啦啦即落傾盤大雨,wtf...連個天都唔鐘意我

搞左一大論入左d cash落張credit卡度夠錢買完

遲曬,番學校印野,唔記得帶個file(但明明記得自己save左架!)

又夠鐘添,點可以咁快比佢知道!

於是,臨夠鐘前隻貓未收工sms話唔得閒,唔去了

結果又是一次慘痛的炒鬧="=

故事即將到尾聲,

當某日上完新工training,

等埋隻貓放工一齊係尖嘴食王漢堡

因為太累,掉下銀包比佢就去左wc

洗洗下手發覺,"弊,我買野d credit card收據仲係銀包度!"

出到去已經見到d單比人用塔羅牌方式排曬係臺面

之後想扮傻話唔記得都冇用,因為張單係一日前先碌....

就係咁,我之前犧牲左咁多黎為左支mic既驚喜

(本來想偷偷地上佢家換左佢支舊mic再叫佢唱歌仔我聽)

而家冇曬了 =.=

幸好我還有十九張"王牌"

十九張卡的封面創作...

對於我moomoo來說實在有難度,

必須承認其中某些是hea底之作...

十萬個對不起!

但其他的真的有放moomoo的心思喔

送禮的那天,貓米堅持要再街上看完

一路看一路朗讀出來令moomoo不知如何是好:$

收到這份回禮很開心呢

一看到封面你畫的貓就不禁從心裡笑出來

有種不能形容的窩心 :)

moomoo loves meowmai (F)

i love us too :$

遲到的生日禮物

2011-05-16T19:15:00.006+08:00

昨天我收到了一共十九封的生日卡。

那是moomoo寫給一歲至十九歲的貓米。

每一封的設計也很好看喔。

有很多我喜歡的東西。

Keith Haring、蠟筆小新、戇豆先生、高木直子、還有窩心的牛叫教學。

這些生日卡我真的很喜歡喔。多謝moomoo。

還有，謝謝moomoo新的麥克風。還有耳筒。

下次唔好咁送了，農場的營運基金會有壓力的。

再見了SM58，你終於都完成你的使命了。

而家就讓電容的Beta 87A接力吧！

最後最後，想說一句，

死亡之旅又再開始

2011-05-10T11:44:00.002+08:00

我又回復到好似中五考完會考果陣咁，不停交更番好多日工。

今日又收夜。聽日考Oral，後日又番，星期六又番。

連我都覺得自己好癲。

但係企得多Cashier條腰會痛，關節又會痛。

到底係咩原因呢？歡迎各位研究。

再見了，5 Pro!

2011-05-07T02:51:00.005+08:00

後記：做耳模。

好搞笑的感覺，好似有人灌些紅毛泥入你耳仔度。

但塞實哂之後，完全聽不到外面的聲音。簡直係一流呀。

這雙耳機是在會考完後，在Uniqlo賺錢買的。

它跟了我兩年，到了明天，它的任務終於完結了。

應該說是，他不用再住在這個軀殼了。是時候要替它找一個新家。

明天就會將耳機拿去店舖給他們改度身訂造的耳模。

改完之後就會像這樣子。

當然以我性格就不會只造透明那麼簡單啦。要做便做實紅/橙色，然後一邊耳機舖上銀色閃石就最適合了。

連工包料可能要過千，不過為了它的新家和壽命的延長，這個價錢也算合理啦。

誰有下次，誰沒有下次

2011-05-02T22:53:00.002+08:00

卓飛仔出新書，咁岩就近生日。

當然將佢地列入Gift List啦呵呵呵。

今次我有哂兩個封面，Yeah！

話說呢兩本書一共由兩個人負責買，一人就係各自本野上面寫下愛的字句比我。

結果呢子楓果本差唔多厚左成倍。你係咪精神病呢？

多謝你地咁識做，同埋帶我食左餐咁好味既泰國野。

Babe would never be apart呀知未呀趙疏文，朋友係一世架！

當然子楓都係啦。生性啦以後，唔好再借人地個封面恥笑我啦。

是一個新的開始

2011-05-01T22:41:00.002+08:00

番新工，面對新同事。

其實大部分都係由Uniqlo過來，乜鬼野事呢家陣。

但係H&M真係一間好公司。

至少佢地個Pantry係舊公司的好幾倍吧。

又有Auto-Vending Machine，私家廁所，環境又闊落。

和同事相處落都唔錯啦，哈哈哈。

之後會比較忙了。

關於愛情，我所知道的…

2011-04-29T04:03:00.004+08:00

事先聲明這些文字並非對於現有感情的宣言、發洩。

只是最近看書看多了有些想法。

大部分人以為自己可以理智面對感情。

其實他們所想所幹的，只不過是在思想上將其合理化。

然後告訴自己「這次很理智不會再傷不會再錯」。

結果又和以前一樣。

從前我對於「愛情」充滿幻想。

一直期待將美滿無瑕的關係出現，即使拍了數天拖也可以在想，

何時旅行何時同居，什麼時候兩人一起走到盡頭。

傷過錯過失去過，得來的教訓是：做人總要現實點。

資訊發達，這圈子裡總是容易找到你要找的人。

離合聚散仿彿變了家常變飯。合則來不合則去。

以往對於愛情的憧憬也會因為這一種「風氣」，徹徹底底給摧毀掉。

每一段關係開始前我也告訴自己，痛也得要放手，要面對現實不要沉淪。

三年前的我，做不到。

一年半前的我，也做不到。

當一個人在感情中愈想去理智，他便愈不能理性地思考。

這一種反效果確確切切的存在。

有時候你以為自己很理智，其實你只是在用「懶理智」的說話來刺激對方。

你問心，那些自以為很有理性的說話，不就像一把把刀嗎？

「偽理性」過後多數會有傷心後悔伴隨。

痛恨自己說過的一字一句，卻又不敢承認自己說錯，因為你認為自己是理性呀嘛。

一隻手掌拍不響。

一旦開始了「懶係理性」的攻擊，

除非對方沉著氣一言不發，否則最後多數只會傷了和氣。

有跡象要吵架，最好先抽離一下。兩個人一齊癲的力量，並不只限於兩倍。

是日很好用 - Biore 淨嫩沐浴乳

2011-04-28T18:00:00.003+08:00

其實第一次見到就已經想試，話哂$39.90買到1 Litre，

點計都抵用過Dove、Johnson果堆掛。

仲有呀我唔係BB架啦唔好成日買強生BB梘液啦。好悶架用左廿年。

琴日係千色買麗的化妝棉（呢樣都好用）埋單時見到有細枝裝，

仲要$9.90，即殺。咁都有300 ml。

富士蘋果味超堅。我一年食過不下五十個富士蘋果，一搽係身就覺得好親切喔。

清爽還可以，唔會太乾，仲要，好香噴噴呀！

網上有人話櫻花味係地雷，會用到敏感。聽到櫻花味都走夾唔頭啦，

少女都唔用櫻花味，我就更加無理由買。

我個人極度推介呢隻蘋果味，遲下就試埋另外隻薰衣草啦。

HAPPY BIRTHDAY

2011-04-28T12:11:00.002+08:00

今天是管理貓的十九歲生日，請盡情留言吧！

Moo!

2011-04-26T01:01:00.002+08:00

呢條片Moomoo話睇完覺得好不安，驚驚啵。

其實我覺得呢個人真係好癲，癲到不得了。

最喜歡既就係好多牛頭圍成一個波咁，係度轉呀轉呀轉。很華麗！

（以下片段可能令牛牛情緒不安，敬請其他動物陪同收看）

維基百科話呢一個Animator鐘意用一種Disturbing同埋Surreal既手法黎到設計動畫。

從佢唔同既作品其實都睇得出，睇完你會諗「到底呢個人係邊個星球黎既呢…」

超現實兼夾重口味的風格。岩我啵。

最精彩既有呢一個。

(n)遊IKEA

2011-04-24T21:05:00.006+08:00

基本上IKEA所有分店都逛過了，熱狗汽水雪糕爆谷都不知道吃過多少次。

這天又帶Moomoo出街遊玩。

逛了兩個小時 MegaBox 分店，趁它關門前半小時便趕去吃點東西。

這是第一次在IKEA Restaurant吃晚飯喔。

基本上十點正可以買到的食物不多，這次點了肉丸、雞胸長通粉、拼盤還有一個沙律。

最後還送了兩杯汽水。盛惠九十六元，還真算貴呢。

那個雞胸完全不像雞胸，試幻想它是一塊IKEA黑心木碎夾板質感的雞肉。

還有不知名醬汁好臭。

果然餐廳食物和商品品質一致。

沙律還好吧，九蚊你還能期望什麼？不過蕃茄倒是甜甜的，全吃了。

瑞典肉丸很好味呀。

拼盤上的燒雞串很美味可惜涼掉了。洋蔥圈總是沒有洋蔥。

有個類似墨魚餅的物體，辣死了。

粟米超級難吃，比KFC水準更低呀。大家來看看Moomoo的樣子就知道。

生活惡趣味 - Miele

2011-04-23T15:22:00.007+08:00

農場裡的Moomoo雖然三番四次阻撓，但最後我都係買了。

好像一把兩千蚊的電動掃把，每天打掃都散發著高貴的味道。

最後連Moomoo都買了一台二手機，

呵呵呵呵呵。（貴婦Mode）

好了認真啦。買兩千蚊一台吸塵器其實不無道理。

第一，它可以用二十年，襟用程度極高，除開條數其實有賺。

第二，多層過濾系統，有鼻敏感的不怕灰塵「這邊吸，那邊噴」。

管理貓和姐姐都有鼻敏感，每逢空氣變差就會不停流鼻水，上兩星期姐從歐洲回來，

鼻敏感發作了兩個禮拜。所以家裡長期開著Sharp的空氣清新機。

仍然是很多塵呀。所以就要靠這台吸塵機每天打掃了。

這個塵袋共有九層，基本上任何塵粒跑進去都沒命再出來。

所以我都直接拿去吸床舖。

一張床褥，每晚睡八小時，長年累月之下，在床褥下積藏了什麼呢？

一起來看看。

上圖就是床舖中被吸出來的塵蟎頭髮死皮貓毛等等。

黑布那張是我的床。話說上兩星期才吸過一次。

紙巾的是爸媽的床，骯髒的程度嚴重多了。

假如你的鼻敏感愈來愈容易發作，那麼除了注意家中空氣質素外，床舖也要定期清理喔。

Key West Cafe @ iSquare

2011-04-23T01:47:00.006+08:00

多謝姨姨請客，難得考完試可以見一見，就不如吃個午飯順便傾陣計啦。

這家餐廳，無論是英文名或是中文名也很奇怪。

Key West，我第一次看還以為是銀行。

點知原來是間Cafe，中文名更怪雞，叫什麼「威匙」，

Oh my god到底這是誰改的名字，真的好難聽好難聽啊。

這次點了一個四人Lunch Set，$325另加一，每人大概九十元吧。

但其實份量是足夠五個人吃的，有興趣的朋友可以五人同行吃四人餐。

先來餐湯。望到已經知好難飲，果然沒錯。

這個所謂意大利青瓜湯，為什麼無啦啦要加打到碎哂的薯蓉？

極蹝口之餘也很臭。建議直接叫他不要上這道菜算了。

其後有溫泉蛋蕃茄蘑菇薄餅。不過不失但略嫌不夠鬆脆。

那個溫泉蛋真的好嘔心，半生不熟還要放在Pizza上，

下次再食一定直接略過。

這個Pork Ribs，賣相一流，味道也一流。

燒烤醬惹味之餘肉質也還好，可惜份量太多要我一個人食兩塊，好滯。

OK掛住食完全忘了拍照。

日式炒意粉和肉醬飯味道還不錯，可是那個飯太多醬汁，

最後變了食肉醬。其實還吃不光。

意粉為何要落蓮藕片呢？可為是日最大疑團。

Overall食物質素良好，服務一般沒啥特別，以iSquare來說價錢都OK啦。

但係個名真係好難聽呢…

新裝修呀喂！

2011-04-21T02:51:00.001+08:00

由部落格搖身一變成為一間農場。

農場內只有一隻牛牛居住，而管理員是一隻貓！

這隻牛周不時會Moo Moo叫，大家小心Moomoo Cow出沒啦。

ASTALIFT

2011-04-21T00:21:00.006+08:00

護膚不能懶。

特別是在香港生活，

一日十幾個鐘頭的學習工作做功課，真的會令人急速衰老。

考AL期間，三個星期都開足Turbo發狂溫習，最後考試時帶個殘樣出現，

別講第時出來做事，晚晚開OT weekend也沒時間休息，

到時殘得更快呢。

ASTALIFT這個牌子，從它一推出我便很留意。

第一，他是日本相機大廠Fujifilm所研製而成的新產品。

第二，廣告由聖子姨姨當代言呀。

而第一枝ASTALIFT便是由睬睬送給我的，謝謝你喔。

用了接近四個月，

膚質真的有明顯改善，在冬天的乾燥時份更能突顯其超強保濕力。

蝦紅素和骨膠原的威力不容忽視呀。

淡淡的大馬士革玫瑰香味。

每次都只用幾滴，生怕用多了會浪費，每一滴也是寶。

有了它，誰要買SK-II 八舊一枝神仙水？

昨天見完工後行朗豪坊（啊係，H&M請了我，五月開工），

看見ASTALIFT有做Promotion就去看一下美白系列到港了沒有。

這次效率真快呀，日本才出了一星期，香港便買得到。

價錢相對日本定價還便宜一百塊，認真覺抵。

家裡的Sofina Jenne Cleansing Foam都用得七七八八，是時候買新的了。

我一直認為洗面產品不用買太快，始終泡泡留在臉上都只不過數十秒，

又何必付出如此昂貴的價錢？不過，上圖那枝Moisture Foam真的物有所值。

$198和$150的差別，在於加水起泡時，

Sofina那枝起的泡雖然多，但不夠幼細。

但ASTALIFT Foam所搓出來的泡泡，有種很厚實的質感，

可以感受到洗面泡的細滑，量雖然不多，但足夠全臉都洗得乾乾淨淨，

用完後也沒有繃緊，是我用過那麼多潔面產品之中，

潔力和溫和程度最好的一款。

它的泡泡，連上年用過Sofina碳酸洗臉泡泡也比不上，

那枝居然還要兩百六，呃錢了。

聖子姨姨今年四十九歲，看起來像只有三十多的樣子。

廣告雖然總有執過的地方，不過她和三十年的樣子，沒有太大分別，

依然是那麼動人喔。

同場的中島美雪給人很活潑的感覺，也很適合當代言人。

大聲對你說收皮

2011-04-14T02:07:00.005+08:00

係，好粗俗呢，容許我咁樣對A Level狠狠的鬧一次吧。

我終於都考哂所有科了，最後既中史簡直係歷盡艱辛。用六個鐘頭寫出接近六十版紙既豐功偉績，我諗真係前無古人，後無來者。呢種機會可一不可再，叫我再考番都未必做得到啦。一直由中化，UE，BS去到中史，都係靠一枝Uni 0.38 打江山，而岩岩好，寫到最後一條題目最尾幾行既時候，呢一枝筆芯岩岩好，冇哂墨。能夠由呢一枝筆去見證住四科卷既完成我覺得好開心架。中史一截、BS又一截，中化又一截，計計埋埋，一枝筆芯就咁由常滿用到冇哂啦。

假如要我評價今次AL既表現呀，我覺得「死而無憾」就真係最適合不過。無論係BS Paper II刀仔鋸大樹又好、中史Tip中題發狂咁寫都好，不得不承認既係，係每一次考試我都最盡力去做。所以，就算結果唔同預期既一樣理想，我都唔會後悔既。黎多次就咪啦！但係如果Turn out淨係衰一科既話，咁唔retake就真係對唔住自己啦。大學，等我呀！

「現在既時間係四時三十一分，時間到，請考生停止作答。若果你有使用補充答題紙，請將佢夾係簿內，然後用繩綁好。係未收到任何指示前，切勿收拾個人物品…」

完卷既一刻其實有想喊既衝動，唔單只係為左果六十版而感動，同時都係因為原來自己終於都跨過左呢一步而覺得感動。呢一個月以來，真係我咁大個仔，最勤力最勤力既一刻。

死亡86小時

2011-04-10T04:31:00.003+08:00

距離最後一科完卷既時間仲有八十六個鐘頭。

最後既關頭，先至發現，原來兩年以來既準備，為既就係十二個鐘頭。

偏偏呢十二個鐘頭，可以決定你人生唔少野。

面對Business Studies，個心已經有豁出去既感覺。

對我黎講，可以溫既已經溫盡，Past Paper睇都睇哂。

識既好彩既咪有分，唔識既，唯有大家鬥作文搏佢比分把啦。

中史呀，其實我真係好鐘意讀你，但你既野衰在Q口又杉手，

有時望住你D題目，真係唔知點落筆好架。

但係無論如何，都唔可以放棄你。司馬遷比人切J都可以寫完史記，

我呢個塵世中既迷途小書僮又算得係咩？我氣！

加油呀！呢粒豆真係要爆Seed 啦！

13/4 00:52

好緊張呀，中史呀。

仲有一科咋，救命呀。哎呀聽日要考啦。

我用一萬個呀~~~都表達不了而家既心情呀。

今週小結

2011-03-31T10:36:00.002+08:00

A Level話咁快就已經考左兩科語文科了。

中化表現依然不過不失，

但UE期望可以達到自己心目中預期既成績，

或者更高啦。唔好兩科全炒就得啦。

剩低既兩個禮拜，就係作戰的時候了！加油呀，唔可以衰收尾架！

開戰了！！

2011-03-24T05:14:00.002+08:00

Final 20 Days，由聽日開始，一路殺到下個月十三號。

第一科唔好失手，大家都要努力啦！

UE趁有時間就狂操狂練，唔好放棄一刻可以浸淫係UE既時間啦！

考完兩科AS，仲有一舊好似屎既AL等緊你。

唔好鬆懈，就算係屎咁難食，我地都要捱過去呀

如果唔係，兩年來既努力（其實冇囉）就真係白費架啦！

放榜見！

Ai, I'm struggled.

2011-03-15T20:03:00.002+08:00

不是說我沒有鬥志，我也有想做好的心態呀。

而實際上我每日也有在溫習。

只不過可能對著中史下了太多時間，感覺上越看就越麻木。

明明是記得的，試做Essay居然怎麼寫也寫不出來，

生氣了撕掉好幾張紙。

好啦那我改溫UE，為什麼還是老樣子呀，Section C好難，救命。

幸運是，高考過後是解脫。不幸的，現在還有二十八天。

我希望這種壞情緒不要繼續蔓延下去了，這可會傳染的。

這個星期睡覺時常發夢，夢見什麼了？

好像試過很多次夢見派成績單，然後看見自己拿3D1E，

這幾個Grade真的醜死怪。或許這些就是自己察覺不了的壓力。

我對我自己有信心，但那不等於會有好成績。

命運就是如此殘酷。

不過在這個時候，還能管些什麼？

都已經走到最後一步，沒有後路可以退，前路也不太清楚的時候，

面對眼前的挑戰，是我唯一可以做的。

祝我明天好運。

祝我高考2B2C。

唉。

有冇人可以好似I Am Number Four咁樣，用自己的超能力打落我度。

幫我叉下電？如有異能者，請留電貓再聯絡。

其實我都唔知自己講左乜野了。算

香港己死

2011-03-07T19:04:00.002+08:00

做家長就唔好帶小朋友出黎示威，盞教壞細路。

李少光

人人都有自己既權利表達對政府施政不滿，有自由可以參與示威活動。然而一班狗官對於「示威」呢種活動，大多數都只會有負面既評價。唔係話佢地破壞社會穩定，就話佢地阻街呀，總然之乜野理由都可以諗得出。「非法集會」呢條罪，係港英政府年代多數只會用作打壓黑社會；估唔到黎到中共傀儡管治年代，呢條罪居然變左直接打壓示威者。

先唔好話家長應唔應該帶小朋友上街遊行，你呢一班狗官其實一早就應該反省下，點解會有家長願意咁做。公民教育相當重要，而真正既公民教育，更加唔係每晚播洗腦國歌卡啦OK版，而係讓小朋友感受一下，身為香港既一份子，應該為社會做D乜野。

水能載舟，亦能覆舟。民猶水也，君猶舟也。政府漠視民意，人民無法表達訴求，被迫採取呢一種手段。所以，政府有乜咁大條道理，行出黎話佢地係暴民，用暴力行為呀？撞你一野又係暴力，仲要話哂比全中南海既人聽；立法會更加要特登休會辯論。你地對香港人既所作所為，就唔係暴力？撞親你就要唱通天？不知所謂。

告別校園時

2011-03-02T01:07:00.002+08:00

各位同學，再見了！

唔好忘記係你人生最火紅的青春歲月，有一班人同你燃燒，發光發亮呀！

生左仔帶出黎玩下呀知冇！

大家都要順順利利入大學啦知冇！

再見啦！

雖然好唔捨得講再見…

恭賀新禧呀！

2011-02-03T00:02:00.002+08:00

發你個財財…

係度祝各位扑友新年事事順利，行大運發大達。

要考試既科科勁過，拎A話都冇咁易。

有工番既就加薪唔加辛。

總言之，合皮扭你個農曆耳啦！

停工告示

2011-01-12T01:45:00.002+08:00

近來學業相當相當繁忙。沒空更新。

不便之處，敬請原諒。

寫在八個月後

2010-12-30T22:29:00.003+08:00

八個月。

　　你可以將一個有三千多首歌的Music Library，聽足二十四遍。

　　你可以將一套五十集長劇重看五次。

　　你可以花十一萬五千二百個三分鐘，淥杯麵來吃。

然而，屬於我和你的八個月，可不是可輕易重來的。

這些日子裡，我像是一隻淘氣的小貓米常常鬧事，

而你總像溫柔的牛牛，在旁一直的呵護、體諒。

貓米真的想和你說一句。我們以後的每一個八個月，

也要一起過。貓米總是不能想像沒有了牛牛掃背的時候怎能入睡。

很淘氣很小朋友是吧。

祝我們新的一年，繼續快樂。

也祝各位扑友，新年快快樂樂，有情人甜甜蜜蜜、

至於冇情人都可以找我吃吃飯的。

可喜可賀可喜可賀

勇敢的小綠豆

2010-12-30T21:51:00.002+08:00

　　七甲班早前流行過種綠豆的潮流。在窗旁的小空間放滿了十多個白色紙杯，裡面都是戴著些綠豆和棉花。在初頭，大家還滿心期待那十多棵小幼苗會茁壯成長，替七甲班房添點綠氣。結果，經過不知幾個星期，有的已經枯萎了、有的則因為太臭而被人丟掉。最後剩下來的，就只有由芳芳轉托給我照料的那一棵。

　　老實說，我不是一個有恆心的人，對於園藝也相當技窮，在家的那棵不知道什麼的植物早就丟給家人照顧了，我連澆水也很懶。奇怪的是，接管綠豆後我反而想它繼續長大，因此每早回校後做的事，便是替它澆澆水、撒些化學肥料、剪掉枯枝；沒有上學也得委托別人替我照料一下。之後我還把它由紙杯成功移植到杯子裡去。接觸到泥土的養份，綠豆繼續長高。可惜不久，它便不再高了，儘管怎樣澆水施肥，它也不長高了。在搬回地下課室的前幾天，我親手把這個只有個多月的生命，給扔掉了。

　　有些時候，人的生命力相比大自然，還真差得遠。一隻小強為了食物，竟然可以走過三十多層來到我家，從大門的門縫中偷偷摸摸爬進來，經過一輪殺蟲水的洗禮後，仍然有力氣從縫隙中離去。雖然我個人對小強有著強烈的恐懼，只要一看到便會渾身打顫，但這種史前生物頑強的意志力，教人不得不配服。同樣地，課室內的小綠豆，縱然沒生長在溫室下，沒有鬆軟的泥土，每逢周末也是最早被人忘記要澆多些水的對象，但它們還是好好的，生存了幾星期。給我丟掉的小綠豆，對不起。希望你在堆填區可以找到個比較好的棲所。

　　今天是十二月三十日，距離高考尚餘不足三個月。連綠豆那麼脆弱的生命，也堅強地生存了數個月，為何人們總是在開始之時便想要放棄？綠豆可是從來沒有放棄過長高的機會，為的只是多吸收點陽光。七甲同學們，像一棵小綠豆，一直的堅持，其實也不太難。新一年快要來臨，希望大家，和我一樣，都可以堅強起來。

Seasons Greeting

2010-12-26T22:45:00.002+08:00

雖然係遲左少少，但我都祝各位聖誕快樂。

新既一年就黎開始喇，唔知各位有乜野新年願望呢？

以前好鐘意回顧自己過去一年做過乜野，反而今年就冇咁既衝動。

可能係份人太懶，難得有假放就索性乜野都唔諗掛。

其實我過去每個星期都自行放多日假既。

原來仲有九十幾日就要考A Level，時間真係過得太快了。

哎，唔寫啦，新年快樂啦。

這是一篇遲來的碟評－ Slowness

2010-12-15T01:21:00.003+08:00

老實說，本碟推出的時間與現在相差接近一年，為何會選擇現在才來寫碟評？其實是在於此專輯的賣點：慢。用一年時間，細味品嚐每一首歌，用緩慢的呼吸配搭著旋律起伏，反而更令人有著深刻的體會。

　　《Slowness》這張專輯，是於謝安琪開完演唱會，相隔半年才靜默無聲地推出。這張碟沒有太多派台歌，plug 歌的力度相對不及前作《Binary》和《Yelling》，相信只有《活著》一曲較為多熟悉。全碟十首皆為中慢板的歌曲，一改在《Yelling》中以節拍強勁的快歌為主打的風格，主張「以快打慢」，用緩慢來喚醒都市人。最初我對此碟也沒有太多留意，事關太多歌也來不及聽完。直至到本年中後期才有機會逐一細心聽聽。一聽之下，發現每首歌背後也有著不同的故事。

此碟的創作不再像以往由周博賢獨攬，加入了不少新晉音樂人如Cousin Fung、徐偉賢。當然，填詞方面大多數還是由周博賢負責。當中有數首歌，聽起來使我有著一份感觸。

　　《替你高興》一曲，送給病逝的人。歌詞裡講述了，患了絕症而離開人世，或許不是最痛苦的事。反而這是一種解脫，「舊日絆腳的顧慮，你終可跨過去」，終使每晚因為別離而偷泣，但「今天的責任已完成，也贖了上世的罪」，全身而退其實值得慶賀，再不需掉眼淚。

港台電視劇《有房出租》是近年難得一見，具高質素的情境劇。其主題曲也令劇集生色不少。整首歌詞就像一段故事，由不同租戶之間爆發出火花，最終因為舊樓遷拆而被迫搬走，一段段感情因而流失於廢礫當中。結尾一段「新廈在這裡築起，舊的區新標記；窗內外耗費不菲，卻再也找不到我共你」頗為語重心長。

另外驚喜之作還有《雨過天陰》、《衣帽間》，恕不詳寫了。希望本地的音樂創作終有一天會重新被重視，不需再一味只寫情歌。

Macbook Pro 之快感

2010-12-10T21:07:00.006+08:00

Macbook pro，書如其名，的確是很外表很專業的一台機器。由Mac Mini走到麥書寶，感覺確是升級了，有著平常人得不到的使用體驗。選擇麥書寶，除了是因為Mac OS X方便好用又簡單之外，麥書寶也有幾點引人之處：

1）不反光螢幕

近年來不論是iMac 還是Macbooks 也好，其所有的螢幕也是Glossy Screen。無疑這提升了螢幕的透光度，但反映的問題卻使很多使用者抱怨。早期Glossy Screen的鍍膜不好，所以十分容易反射光線，這情況到今年新的Macbook Air登場才有所改善。不過小弟所用的麥書寶，尚未跨入Unibody年代，還是Matte screen，爽度的確十足。十五吋的螢幕相對以往使用的十三吋也相當「見使」，可以同時開啟多個程式。加上Non-TN Panel，色彩的顯示相當不錯。

2）背光鍵盤

試過摸黑打字的滋味嗎？打算以螢幕亮度照亮鍵盤，卻覺得太刺眼；調暗了又不夠光。背光的鍵盤果然是最佳的選擇。這種設備現時也不是有太多機種擁有。

3）Trackpad

撇開這一兩年的Multi Touch技術，雙指Scroll的技術早已在八九年前Powerbook G4誕生。其直覺式的操作相較其他廠商只放一條Bar在trackpad右邊的做法來得更親切，實際使用上也相當方便。那些廠商到底是否真正明白顧客的需要嗎？我相信這不是一個很難造到的feature吧。

全金屬外殼雖然換來燙大脾的熱度，同時重量也增加不少，但整體來說也是一台相當好的工作機。

呼，又好久不見

2010-12-08T23:09:00.001+08:00

我實在愈來愈懶，這也沒怪。

冬天到了嘛，也是我這種懶人儲糧準備冬眠的好日子。

那，冬眠了又何來更新blog呢？

換回了macbook pro，感覺真的十分良好。

重回mac的日子真的不錯。

最近請假請到校務處在查我，不用吧。有同學比我更厲害。

一打多兩日，死未。

我倆就像是在鬥多似的，耶。

先不寫了，電腦也搞了幾個小時，好累。

人生的第一次入院

2010-11-20T23:28:00.004+08:00

估唔到第一次入唔係做手術，而係比人通櫃。

啊講錯左，正確黎講應該係照胃鏡同埋腸鏡，仲有做心電圖。

由於有買到醫療保，所以可以住私家醫院。

今次入左法國，下次可唔可以入美國醫院？有冇架。

私家醫院收費高，所以人手唔緊，個個姐姐都好Nice架，佢地對傻笨都好Nice。

佢地一見到傻笨就問，嗯，佢一定係由細陪到大架啦。

臨走個姐姐仲叫我唔好漏左傻笨。我又點會咁大頭蝦呢？

不過好慘架，冇野食。琴日六點食完最後一碗粥，就開始飲瀉水。

200ml 瀉水溝埋2L水，真係連仔都可以痾到出黎。下次唔好再搞了，怕怕。

其實我份人又唔係真係話好怕痛，但我真係好唔習慣有一d野進入左我身體。

呢枝咁既野，由十二點半一直插到四點，姐姐先肯同我掹走佢。

我話：做完架啦喎幾時先可以拎走佢姐？

佢答：等多陣啦，你食埋野冇嘔就得。

媽呀。

話說去照鏡果陣係打鎮靜劑，

（其實係迷藥咋嘛，有乜理由打完會訓到比人通櫃都唔知）

阿姐姐叫我放鬆d，好啦我放鬆。佢話右手果針唔岩位，搵唔到血管喎！

哎呀咁就要試左手。係左手搵左一輪，又試插針，又唔得！哎呀我真係就黎暈啦。

再試多次右手，姐姐用手指彈下彈下，一邊彈一邊話你做乜鬼野d血管咁淺架。

我含住舊口膠，成個口麻哂咁樣答佢：「咁我都唔想架！」

佢又聽得到喎！好野。

第三針終於入左。好野，打埋果兩劑唔知乜野我就好快訓著覺。

比人通完都唔知咩事。

我再擘大眼果陣時呢，姐姐已經將我推番入病房啦。

然後好快又斷左片一粒鐘。之後醒一醒，醫生講過乜呢？唔記得左。

等我真係清醒既時候，醫生就過來同我講下有咩結果啦。

佢話呢，可能我食野太快太急，所以個胃有時消化唔切，

照胃鏡時發現有一綠色物體依附，完全唔知乜黎。我諗係幾日前食落既野。

然後醫生問，我朝早有冇飲咖啡，我答冇。可樂呢？我有。

佢話喎，睇睇下見到有黑色野，以為胃出血，但搵好耐都唔見有。原來係飲可樂。

另外醫生話我個胃有一度損左。

我有放過利器入去咩？唔記得啦。

同埋我有痔瘡囉咩事。

有興趣睇圖就留言啦，一齊食飯睇。

由iphone到android，再回iphone

2010-11-15T22:12:00.004+08:00

當初換機的原因，係因為眼見Milestone成功令Motorola翻生，相信XT701都應該相差不遠。同時也有點覺得要換換新環境，於是便換了這台。

之後惡夢便開始了。

用不到幾天，就發覺手機聽歌時會有電流聲，相重嚴重的電流聲。於是我決定去換機吧，好了換了好像沒有那麼大的問題。不出一日問題又再出現，連帶另一個困擾我多時的問題也一同出現了。就是，傾電話時會有很Annoying的煲水聲。

它是無處不在的，任何頻率的煲水聲我都聽過。結果再多換一次機。但問題沒有被解決，好了我投降了，拿上維修中心吧。

我由八月至今到過Moto維修中心不下十次，主機板換過前蓋換過，可以換的基本上都換掉了。但還是沒有解決問題。好了上個星期還開始狂Crash，夜晚一次早上又一次，只是想上個Facebook check點東西就給我當機，冇你乎。這就是為何我換回iPhone的原因。

不是Android的 OS 不合用，只是這台手機的品質真的很詭異，嚇死人。還是早早出清算了。

嗨！

2010-11-14T23:04:00.004+08:00

好久不見了，是否很想念我呢？相信你們也沒有吧，哈。自嘲吧。大家不好擔心，我還沒有死掉。只不過要上班拍拖讀書時間真的不夠用，哎喔。

好了。說說最近都有些什麼發生了。

第一件事，我又換回iphone了。

前文提要

用左三個幾月Android之後，我決定番番去3Gs既懷抱。

今次繼續以超低價入手，多謝媽媽同事。

第二件事，最近每日都過得太充實。食時新睇黃子華又番下工，番下學，每個禮拜都係差唔多咁過架啦。由於充實得滯既關係，所以呢個Blog都要放低佢暫時休養下，遲下先Pick up啦。得閒都會寫下野既，放心我唔會死。

一起走過

2010-10-29T00:28:00.002+08:00

開心的

不開心的

我們都一同經歷

六個月

未來還有很多六個月

靜靜地守候著

待我們去走過

謝謝你送的小克

謝謝你送的卓韻芝

我全部都很喜歡

我愛你

最近一定要寫的兩件事

2010-10-24T18:27:00.003+08:00

《一》

找到了一份很好的兼職工作。

基本上星期六才上班，有時候可能星期天也要。

主要做的都只是掃描文件、打打字等文職工作，

每天約六至八小時。

薪金方面，的確很理想，數字上也充分展現了外國人大方的性格。

七十元一小時。很好賺的工作。

真的希望可以長做長有，賺數千塊也不錯，哈哈哈。

《二》

看了《告白》。

是一套十分值回票價的電影，絕對推介入場觀看。

鏡頭的安排十分絕妙，剪接技巧成功營造出電影的恐怖感。

高潮位令人意想不到，有種快要窒息的感覺。

據說Soundtrack中有radiohead的歌，但我不認識。

不應該拖那麼久的品香樓晚飯

2010-10-12T01:17:00.005+08:00

話說上星期五同睬睬到品香樓吃晚飯。

品香樓係南山邨，和CityU很近，徒步走過去都不過十分鐘。

這次點了三個菜，飽死啦。

明明在拍餐牌，後面的人想怎樣了？

這次還點了啤酒，有點可惜的是只有生力嘉士伯藍妹青島，

偏偏沒我最喜歡的喜力。

嘉士伯是出奇地苦，我覺得。所以還是喝生力算了。

小菜還真的很不錯，分別有咖喱牛腩菜煲，南乳雞翼和咕嚕雞球。

牛腩真的很好吃，炆得夠腍，咖喱味全都跑進去了，

還有些冬菇草菇之類的，也是至愛。

雞翼炸得很香，皮夠脆肉夠軟，吃不出是雪藏雞的味道。

南乳味不太重，可惜。

雞球算是不過不失，合格啦。

中學最後一次旅行

2010-10-03T22:41:00.004+08:00

話咁快就係呢度七年了。

今次最後一次旅行，玩多過食，實在太開心。

由於今次太懶了，我地決定叫．外．賣。

難得肯德雞又送到黎喎，四百幾蚊咋呢度都係。除開每個人都係五十蚊到。

我好滿意這張。

一個年代的結束

2010-09-24T01:15:00.007+08:00

七年過去了，由以前的中一雞，貶貶眼變成全校最高班的Form 7學生，面對即將來臨的高考，以及畢業，除了「時間真過得他媽的快」也沒有什麼好說了。只不過，七年過去了，許多在我們腦海內留下深刻印象的一事一物，現在還剩下多少？

玉記美食，一家以售賣午餐飯盒為主的食店，早在我讀中學前已開張了。玉記的競爭對手只有一間，就是距離玉記不到十五米，一間命為偉強的飯店，但其實兩者也沒有太大的競爭關係。玉記美食沒有怎樣裝修過，就連門口的招牌也只是由人手以油漆寫上便作罷，沒太多的花巧，算是某層次的「實而不華」。玉記的營業時間由早上至下午，夜晚休市，主要是做學生的生意。這一年早上多光顧了玉記，主要都是買它的炒米粉或腸粉回班房吃。六蚊一大包，其實也挺飽的，味道還不錯。

而午市方面，多年來玉姐首推的都是三餸飯。每逢吃飯時間，都先會到玉姐的舖面前看一看，查探今天有什麼菜式。偶爾會發現新款菜式的存在，當然少不了中流砥柱的Classic款。經過食飯盒三四年的得著，玉記的招牌菜排行榜如下：

1) 咕嚕肉 - 又稱Gulu肉

玉姐的咕嚕肉，永遠都是配菜多過肉。正確一點來說，那些半肉半骨，甚至全塊都是骨的，還算不算是咕嚕肉？Anyway，這道菜應該佔據了排行榜當中的頭三名位置，因為每一日去到，也是有它的存在。味道方面，當然不及四十蚊買的一碟小菜，但對於十零蚊一個飯盒來說，算是交足功課，除了天天有些微不同之外。而玉記的so called competitor偉強，也有賣這道菜。不過味道就不及玉記了。

2) 油浸茄子

冇寫錯，的確是油浸茄子。其實小弟以前從來不吃茄子，只不過自從轉食飯盒後，看見某同學對茄子的熱愛，也令我對茄子產生了興趣。一試，便愛上了。我覺得茄子的口感其實還算特別，不過在玉姐的烹煮之下，她的茄子不外乎「又油又散」。曾經有某位女同學叫我留意她的發泡膠飯盒，裡面足足有接近一瓷羮的油。我問她那些油是不是妳吐的，她說：「唔係呀，係玉姐d茄子啊」。天呀，三數塊小小的茄子，真教人意想不到是多麼的肥膩啊。而近一年來，玉記的茄子更有變質之嫌，愈來愈重口味。前幾天我點了茄子，結果吃了兩塊便吃不下去。真是他媽的咸。一眾食家也開始懷疑，玉姐的味覺是不是逐漸在退化了。雖然茄子愈來愈難吃，不過它的地位還是高踞排行榜頭頭的位置。

3) 唔知乜炒蛋

另一樣玉記美食的常客，便是這個唔知加了什麼來炒的炒蛋了。說是火腿炒蛋也不對，因為有腸仔又有蔥，其實我找不到一個合適的菜名給它。這項菜式應該算是玉記美食當中，水準最為穩定的一款。除了間中吃到比較碎的炒蛋外，其他方面一切ok。有時能夠成為最後一個揀中炒蛋的人，那天的心情會突然高漲，有種爽歪歪的感覺。

玉記美食的菜式數之不盡，相信就是這點，玉記美食較偉強更受歡迎。玉姐的常有菜式包括了：吉列雞扒、午餐肉、荷包蛋、奄列蛋、椰菜、一粒粒的薯仔、油淋淋的腩肉、豆卜豬皮蘿白、激辣豆角、土魷蒸肉餅……。而也不有少期間限定的菜式，例如冬天才有的連藕、不常出現的咸魚、又或者是曇花一現的咖喱魚蛋和粟米餅，全部都是相當美味不過很快就下架。

雖然玉記的菜式選擇比偉強的多，但有一個地方，玉記比不上偉強，就是飯的量了。未知是否因為成本不斷上漲的原故，玉記賣的飯盒，白飯愈來愈少，由以往的剛剛一平盒，演變到現時連盒的一半也沒有。所以，許多時候吃玉記飯盒，最後會變成有餸而無飯。相反，偉強的阿姐出了名是孤寒的，生怕蝕給你們這些中學生。例如要豬扒的話，只會夾兩塊，不多不少，有時候還會獲得豬骨一大塊。而偉強的菜式來來去去也不外乎沒有雞的咖喱雞、茄子、咕嚕肉、炒菜、麻婆豆腐等等，十年如一日。

這些美味的飯盒，陪伴了我們許多個午膳的時光。好景不常，最近有傳出玉記結業的消息，而這個消息已被編採部同事證實了。由以往十蚊加一蚊、十二，以至現時十三蚊的一個飯盒，足足貴了三成（數字上只是加了三塊），其實我們相信也不能抵銷成本上升所帶來的額外開支。玉記美食過了這個月，如無意外應該會光榮結業。而其後舖位會有什麼發展我們也不清楚。至於玉記結業的原因，到目前為止也未收到任何消息。

或許是玉姐認為，舖頭到了這個時代，都應該退下來，反正新一代的學生大多都富裕，午膳也偏向出外用膳，剩下的就只有我們這些想省個錢的一群學生。明顯地，這群的人數其實也漸漸的在減少。「買飯番學校食」已經不是下一代的潮流，而Canteen的檯也不像以前般，要爭得你死我活才有，反而每天也有空檯，正等待同學的前來。玉記的結業，正正見證了我們這一批學生的成長、壯大，然後一個個貿然離去。有許多在我們這一群人流行的事兒，早已失傳於低幾form之間，但我們也沒打算讓這些留給他們。終歸這是我們的年代，哪又可以輕易放手？

李氏力場又出功？

2010-09-22T00:39:00.002+08:00

打風又打唔成
呢個風真係無鬼用

但係可唔可以唔好咁凍?
我仲要訓覺的，我可不想病呀
你話詐病就得姐:p

乜我個頭髮好似《十兄弟》咩？

2010-09-13T00:43:00.003+08:00

補補習，食食飯

2010-09-11T14:15:00.002+08:00

話說Joesph Li開左幾堂free lesson，試讀價九十蚊三堂。帶同學仔一齊試讀呢，加多三十蚊，最多可以帶十個。咁即係話，帶兩個又係百二，帶十個都係百二。最後我地成班十幾個人去左補習。

當然，幾蚊一堂唔好期望有咩好野，好多同學都唔鐘意，咁咪當跌左錢囉，哈哈。補完習好好好肚餓，大家一齊走左去食煲仔飯。唔知係咪落住雨，好少人食，我地唔使等就已經有位，十幾個位你都咪講少。

好眼力既認唔認到，係鏡頭右手邊戴住眼鏡食緊飯既係邊個呢？估中無獎。十四人同行食飯實在係一個難忘既經驗，唔知完左中七仲會唔會有咁既機會呢。到時仲可唔可以大大聲聲鬧cup cake，哎呀。

之後，我地仲走左去食事後糖水添啊。整鬼你。炒冰又真係幾得意喎個口感，哈哈哈。真是愉快的一天。

zzzzzzzz.........

2010-09-08T06:20:00.000+08:00

溫書真係好累。

港島遊記

2010-08-30T01:12:00.007+08:00

又要出去整呢整路，人都燥底。

好彩，SD卡即換張新的，電話拎番都冇乜問題。

咁就等我同睬睬一齊殺出香港啦！

話說我地沿住開源道，一直行啊行，行到黎觀塘碼頭。

我一直以為呢個碼頭其實係冇船搭的，點知有。不過規模實在太細。

成個候船大堂雖然好大，但其實只得我、睬睬、同埋仲有一個推車仔既男人。

前前後後上船既有幾多個人呢？好似二十個都唔夠。

其實搭呢架小輪真係好free，free成點呢？即係由大堂行去上船之間果度閘，完全冇鎖，仲要由繩係老遠拉開。真係好唔知想點。船程大約10分鐘，比起由尖咀去中環耐左些少，價錢都偏貴，不過五蚊算啦唉。

果然搭船既決定係岩的。一落船就有發現！

呢隻據聞係以北角碼頭附近做地盤的貓咪，有個伯伯問佢：做咩呢個鐘數走出黎啊？又想食野呢？真係可愛。唔知係咪街頭貓咪多人錫，所以佢地都好鬼死嗲好溫柔。我先係岩岩行埋去，佢地已經趕唔切要走過來hi你隻手仔，又不停係我腳邊行黎行去，擺哂pose比人影相，真係可愛啊哎喔。

之後，搭電車搭到去中環，去食永樂園。

奶茶很不錯，豬扒很好味。之後就繼續行程了。行左上去荷里活道，又有貓咪！

真係太可愛了，忍唔住留低陪佢玩左三個字都有。

影到咁上下，就歸家了。

哎呀

2010-08-25T04:52:00.002+08:00

荷蘭館特輯拖左咁耐，結果係：爛尾。

學哂馬田兄D衰野添。

呢排精神比較紊亂，訓唔好坐唔安，唯獨是食得落。

除左食之外都冇乜邊一樣Function係正常的。哎呀。

唔好理我住了，等我抖番三兩排吧。

情話又綿綿

2010-08-20T02:28:00.002+08:00

你知道嗎？當你去了O Camp的這幾天，我很想念你。

真的真的，沒有在騙你，

當然你也不會覺得我在撒謊吧。

記得上個禮拜，凌晨十二多那夜，我攤在你的床上。

和你一起看，你小時候寫的日記嗎？

儘管掀開每一頁，每一篇日記的開頭也是「今天很開心，因為……」

那寫得東歪西倒的中文字，夾雜三數個英文字詞，

有的更是中英譯本皆備。

看著你小時候寫的一橫一直，也足夠令我幻想得到，

睬睬小朋友的童年到底是怎麼回事。

最開心是和表弟一塊兒玩，和舅母去美麗華戲院看你人生中第一齣電影，

又或者是給媽媽丟玩具了。

當我睡在你身旁，將字句緩慢的讀出，然後再看看你那囧囧的樣子。

我很快樂。

快樂得想抱著你，親下去。

找天我也給些照片你看，讓你看看林小朋友的孩童時代，有什麼讓他留下記憶。

你知道嗎？

最近撥通電話第一句便是「想念~~~~~~~~~~~~~」

因為我很喜歡這句話，也很喜歡對著你說想念。

下著雨的夜晚，記起你最想做的事，是抱著我，細聽窗外的雨聲。

想念就像雨水般，一串串連綿不斷。

P.S.這兩天都沒溫書

不要打我=(

成桶都係紙巾

2010-08-19T02:50:00.003+08:00

對，成個桶都裝滿紙巾。
放心，不是玩得太多要頻頻抹，只是個鼻最近好像又出事。

個說細細個唔知點解，忽然和家姐一樣，有鼻敏感了。
據說是聞得太多二手煙，又或者長期處於冷氣環境下 or something else，總之有便是了。
之後每早睡醒便會極級鼻塞。
以前有睇中醫，貼過穴位，鼻敏感有幾年是消失了。

但最近症狀又發作，吃了藥又冇用。

係，我知道鼻敏感無斷尾之療法，但最起碼減輕下病情也好吧。

救命。

型棍相

2010-08-10T22:11:00.006+08:00

明明是替同學慶祝生日，結果影下一大埋型棍相。

不過我的技術很好啊哈哈哈。

Homer Simpson，服裝好神似。

Oh my god is he Harry Potter?

鄰家賣汽水小妹妹。

是日最型棍。

所用器材：

Panasonic GF1 w/ Olympus M.Zuiko 14-42 3.5-5.6

二零一年上海之行 - 世博篇（中）

2010-08-06T17:29:00.007+08:00

瑞典給我的印象除了宜家傢俬、H&M和瑞典肉丸就沒有了。

然而大家在日常生活中所接觸的，包括每天早上搭地鐵會看的都市日報、駕的Volvo/ SAAB、十年前瘋魔一時的愛立信手機，其實全都是來自這個國家。瑞典是個充滿創意的國家，單從展館的設計已能看出。

場館外型透過大量的幾何線條組成，在兩幢建築物之間也採用了玻璃橋來連接，增加了採光之餘也是特色之一。看起來雖然有點像捷克館，但在細節上還是可以分別出來的。在場館入口處，有一條條巨型可旋轉的柱體，柱上有一個一個載著照片的燈相，記錄了瑞典人生活的一點一滴。天花懸著一盞盞Ikea Style的花花吊燈，與白色巨柱相襯得恰好。

數百個出名的品牌，原來拉鏈都是由瑞典人發明的。Oh, Yeah.

世博也有滑梯可以sir，真有創意。坐在布袋上sir也是第一次看見。再走下一層更厲害，有千秋可以蕩。到底這是遊樂場還是什麼呢？太有趣了。

二零一年上海之行 - 世博篇（上）

2010-08-02T22:50:00.006+08:00

排完三日隊之後，任何的排長龍也不算什麼。

上海之行，首要目的當然是入世博參觀。雖然不是說特別有興趣，不過有機會便衝出香港參觀參觀啦。總結三日經驗，入園參觀有兩大要點：第一，假如想到熱門館的話，請早兩小時到門口去排隊，入園後第一時間衝往館子就對了；第二，計劃參觀路線，要做好排幾粒鐘的心理準備。三日之內去了接近二十個館，令人印象最深刻的有捷克共和國、瑞典，和荷蘭館（對，全是歐洲的，我沒去過中國館那兒）。

捷克館是不用排的，直接走進去便可以。一開始沒有抱什麼期望，反而有很多的驚喜。

外牆的一個個圓餅其實是冰上的曲棍球，代表著捷克在冰球方面有著輝煌的戰績。不過依上圖所見，當中有不少已經被強國人民擰下來帶回家當紀念品了。美人魚也可以拆回家，對強國人來說，有什麼不可以拆的！？

由九個螢幕所組成的圖畫，每按一下對應的按鈕，也會變成不同的動物部位。看著這些不協調的圖畫，確是令人捧腹大笑。捷克館面積雖少，但其展覽的功力卻不簡單。他們運用了不同的方法，例如上圖的互動方式，又或者是倒吊在天花上的展品，令每位參觀的遊客也留下了對捷克的印象。

到底他在做什麼？原來這是每日只有一次的「個人香水調配服務」，是專為捷克館第五百名參觀的遊客而設的「大禮物」。當大家都在注視著裡面的青年時，他會有什麼想法呢？

在上文提及，捷克館十分擅長於利用不用的巧妙布置，讓參觀者感受到耳目一新的感覺。上圖的鏡箱，充分的運用了鏡子折射光線的原理，來形成一個大球體，在現場觀看可以何其的壯觀啊。

這個斜斜的草地，看起來特別憂閑，讓人有點兒想在上面躺著睡的感覺。大家留意到右上角的那個Show Box了嗎？就是這種特別的方式，人人都得向上望。明天再續。

最後一次，或者

2010-07-21T17:22:00.003+08:00

或者係最後一次踏上舞台，我要盡情咁享受。

You've got a friend in me

2010-07-17T08:14:00.004+08:00

（少劇透，不過依然慎入）

最後一集終於來了，意味著 Toy Story 的故事到此為止了。雖然對這部電影的鍾愛程度並非相當的高，不過有新一集上畫，還是會看的。話說星期四和睬睬踩完單車，吃過晚飯後便打算到那兒去hea多陣，結果便跑去看電影。那家戲院的九點半場，空位其實也頗多的，不愁沒有位子坐。最後我們選擇了看菲林版，因為上次看3D他看得太辛苦了，戴不下那個眼鏡。

劇情我不多說了，費時做劇透X啦。一百一十分鐘的精彩，真教人想多看一次。最後的部分很感動，差點也要哭了，哎也很眼淺。是一套很快樂，也令人很傷感的電影。反高潮位是你意想不到的；爆笑位是猩猩和小丑出場的時候，記著要留意哦。謝謝 Woody和Buzz 給了我三集愉快的回憶。

白泥初訪

2010-07-13T22:50:00.005+08:00

傳說中，白泥是個很美麗的地方。

但一直也沒機會去，這次Troytroy帶我去白泥了。

出發之前去了爽爽麵家吃午餐。係基朗讀左六年都未食過。

美味美味美味。

豬扒撈麵，豬扒很有媽媽味道的影子。雖然肉質嚡口了些少，但很惹味。

醉雞看似不錯，但因為我不吃有骨的，所以未能給評語。

菊花茶很好喝。埋單六十九。

好啦食飽飽出發去搭車了。原來白泥真的很遠很遠。仲入過流浮山，鬼囉。

終於到了！曬到啊，頂。

由於佢係咸淡水的交界，所以會有呢類植物的生長：

由於實在太曬但又仲未等到日落，我地決定開遮。

當然唔係普通遮啦，哈哈。

傻笨話想曬太陽，由個袋爬左上遮頂，你睇佢幾貪玩。

Magic出黎啦！！！！！！

呢個先係最Magic：

幾時再去啊？

中森明菜

2010-06-28T04:05:00.004+08:00

細細聲話你知啊，其實我都幾鐘意明菜姨姨架:$

強勁既震音，震啊震啊震。

給親愛的一封信

2010-06-28T03:20:00.002+08:00

親愛的：

　　最近掛住忙社際戲劇既野，忙到完全唔記得左，原來我地已經兩個月了。原本仲打算搭正十二點同你講比個驚喜你，點知最後我自己訓到死左都唔知乜事，要由你提番我先知，哎我真冇心肝。

　　雖然只係短短兩個月，但我地經歷既野，都好似比起以前既多。開心、唔開心既，我地都一齊去經歷，一齊去嘗試。或者我地成日都會因為小事而有爭拗，不過去到最後唔係你不斷咁講「對唔住啊林小朋友」，就係我不停問「點啊仲有冇嬲啊？」。我自己都唔敢想像，自己能夠有一個咁錫自己、愛自己既另一半。每一日，我都好感恩。因為我唔會係睡夢中長眠，仍然有機會可以見到自己心愛既人。我都明白，林小朋友有時其實會發脾氣、小題大做，但你從來都冇因為我咁樣，有半句怨言。我應承你，以後唔會再亂咁發脾氣，好嗎？

　　但好多時其實我都唔識得點樣去同你相處，或者呢樣野真係要大家慢慢摸索。不過我會努力的。至於你問我果樣野，我可以好肯定，以後都唔會再發生。因為，我既身邊已經有你，已經足夠。我好想令到你唔需要係呢段關係入面左度右度、乜野都要諗過先講、先做，做番一個最平凡、最簡單既睬睬。好嗎？無論我有幾忙都好，我個心都有塊牌時時刻刻提醒住我，寫住「林小朋友愛睬睬」架。兩個月紀念快樂！

你最愛的

林小朋友

哎…好忙啊

2010-06-28T02:21:00.003+08:00

哎，我都知我命苦架啦。考完試都忙到甩碌。

原來對上一次update已經係兩個禮拜之前既事，其實十八號開始就已經訓左身去搞社劇。

雖然有一大班得力社員同學仔一齊做野，但都咪話唔辛苦。

每日都排戲啊，整道具啊，講下粗口咁（呢個其實係重點），都幾開心既。

一粒粒提子咁畫，畫三大抽你都咪話唔辛苦，好彩唔使我畫姐。

我另外畫左個喜羊羊架，哈。

由於我地霸左個班房，所以隔離社既同學仔就被迫出去排劇啦。

不過怕咩啊，都冇老師既。我地實在太free。

好切合子浩既身份。

去到七月四之前都未會再有update架喇，等下喇。

記住要掛住我啦，哈。

623 中環見

2010-06-14T04:25:00.004+08:00

係，我訓唔著教。

上上下高登，忽然見到一堆關於623政改方案決議既帖。

我咁大個仔都未試過有種咁強烈既感覺。

我覺得，係時候企出來，拎番屬於自己既野。

我都唔想唐英年做下屆特首，佢隻馬臉，除左屌屌Fing仲識乜？冇。

1200人既小圈子選舉，如果叫做普選，我移民算數。

功能組別呢班垃圾，如果仲要繼續維持現狀，我真係死心。

呢排Vuvuzela好紅，買定隻傍身，到時吹爆班龜。

仲有一個禮拜啊

2010-06-13T23:47:00.004+08:00

溫B.S.已經溫到無心戀戰，講真的，哎。

我都好似已經連續咁溫左四五日，人都想嘔。救命。

唔該，快D考埋呢兩日，等我可以全心全意咁樣去溫中史。

我發覺，原來自己真係幾鐘意讀中史。

起碼唔係B.S.，真係好似將一舊舊屎夾硬放入腦。

Output呢樣野留比大叔算，哈哈。

話說琴晚，我湊左女朋友番屋企。

係女朋友一號至真。

我覺得呢樣真係好屈機，連隻Mon都可以較顏色。

睬睬話佢偏綠喎…我又唔覺，其實係咪我有眼疾呢？

係啵，咁鏡頭呢？

其實未買……………

再見了LX3！

I'm kinda busy

2010-06-04T00:54:00.002+08:00

Well, didn't have too much time to update this blog.

Since I have to so revision for the final exam, I may not be able to write something new until 18/6. Need to study everyday, and no time for having fun with my computer. As I've promised, I will get back into top ten. For myself, and also for himself =]

Please ignore any stupid grammar mistakes I've made. Thank you so much.

真的綁架了

2010-05-30T16:20:00.005+08:00

回：生活小情趣 01

係啊，寫閃光彈寫上癮咁又點。哎喔積積埋埋太多了。

話說琴日一大早去溫書，溫完書交收iPad就行街街。

之後番美孚圖書館，Studyroom爆哂。被迫上一樓。

溫溫下書期間有個咁既Msg：

哎也死仔，係條柱後面偷窺我。

之後我地去左嶺南之風度坐左陣，影下相咁囉。

佢又有新作了。

我覺得呢張相係有助再次提升LX3既銷量的。

之後呢，我們就行去買Pizza，番佢屋企食了。

一下子食左四塊半，加四隻雞槌，再搭一罐冰凍七喜，真係爽歪歪。

之後我地仲KO左四分一盒家庭裝雪糕，太美味了嗯。

食飽飽之後，就去左沖涼了。

沖完涼，被綁架既時機就到了。話說林小朋友今晚成晚都比睬睬綁架。

又唔出得聲又任人魚肉，哎也呵呵呵。

估唔到我們的初夜就這樣的發生了。

雖然訓得唔多但都好舒服，嗯。

一朝早起身有人攬住其實是唔錯的。

若干年後或者我地晚晚都咁做吧。

之後我地又食多左四分一雪糕當早餐，我就出發歸家了。

馬田兄有，我都有！

新品試用：Sofina Beaute 系列

2010-05-30T15:50:00.005+08:00

（好鱔稿feel添）

得閒曬太陽雖然不錯，更可以吸收維他命D，然而，不論是過量UVA或UVB，都會損害人體的皮膚。美國皮膚癌基金指出，每天使用防曬產品，可以大大減低九成肌膚老化的問題。

市面上的防曬產品主要分為兩類：物理防曬和化學防曬。物理防曬主要採用Zinc Oxide 及 Titanium Dioxide 作為原料，具有高穩性，以及不會滲入皮膚的優點；化學防曬則是採用合成酯為原料，其好處是質地清爽，能夠在肌膚上形成一層保護膜，然而其成分可滲入皮膚，遇強光時更有可能分解。因此在選購防曬產品時，應留意其物理及化學成份的比例。

防曬乳液 SPF 50+ PA+++ $270 32ml

是次賣iPad賺了錢，便急趕去使錢了。Sofina的防曬產品一向有口碑，而今次的Beaute系列防曬產品，更貼心的推出了不同的質地，有清爽有滋潤，切合不同類型的肌膚。更重要的是，個包裝同Design好靚啊！

碳酸潔面泡泡 $260 170g

之後心郁郁，買了一直想試很久的碳酸洗臉泡泡。BA姐姐說只要泵一個乒乓球大小的份量，塗滿全面敷一分鐘，之後才打圈按摩。泡泡是用過的潔面產品之中，最為豐盈的。簡直同Cream有得揮。用完半小時後，皮膚也沒有絲毫的緊繃，保濕程度值得加獎。最重要的是，針對長期缺乏休息的皮膚，泡泡內含碳酸成分，可以使血管擴張，血液得以加快循環。以後唔使死屍樣咁番學了。

煮飯記

2010-05-30T15:24:00.005+08:00

回：生活小情趣 02

話說係好耐好耐之前，林小朋友話過要煮午餐比睬睬食。

我終於都煮左啦。

其實呢件事都發生係兩個禮拜前，一直冇時間寫。

話說果朝，我地一齊去跑步。跑左半個天水圍咋，佢就冇氣。

跑完啦，當然係番屋企沖涼架啦。沖完涼囉就……

（兩小時後）

好啦，起身落街買料煮送，今餐煮埋哂啲奇奇怪怪野。

咖喱午餐肉撈公仔面

Double足三兩餐蛋治

益力多

等我地直擊一下廚房既現場先！咦拎住把刀喎，有危險，到底佢想點？

罐午餐肉好核突啊，油冧冧，一刀刀切落去都覺得嘔心。

「哎也彈到手啦」

「有冇事啊？」

「冇啊，少少咋嘛」

「等我錫番下個傷口先」

食蛋啊，幾健康。煎得幾靚。

成品出場了，話說我地一口氣煮左兩個公仔面，

撈埋汁食，食完之後有種想嘔既感覺。

面包。午餐肉。蛋。午餐肉。面包

咁樣既pattern真係會食死人。

「嗯…林小朋友真係煮得好味」

以後要食就出聲啦，嘻。